Рамонкі з малой радзімы

Дачка сваёй зямлі. Менавіта пад такой назвай напрыканцы мінулага месяца на Дрыбіншчыне адбылася творчая вечарына паэтэсы, члена Саюза пісьменнікаў Беларусі Ніны Кавалёвай. Ва ўтульнай зале Дрыбінскага Палаца культуры сабраліся сваякі і землякі Ніны Дзмітрыеўны з навакольных вёсак і Дрыбіна, прыхільнікі яе творчасці. Горацкую дэлегацыю прадстаўлялі галоўны спецыяліст аддзела культуры М. Студнева, выканаўцы песень паэткі Н. Курбасава і Т. Турманава, акампаніятар Р. Макееў і аўтар гэтых радкоў. Як адзначыла дырэктар Дрыбінскай бібліятэчнай сеткі Тамара Салтанава, не забываюць Ніну Дзмітрыеўну і на яе малой радзіме. Установы культуры пастаянна праводзяць мерапрыемствы, на якіх знаёмяць чытачоў з творчасцю зямлячкі. На фоне слайдаў, што адлюстроўвалі мясціны дзяцінства і яе далейшы жыццёвы і творчы шлях, гучалі вершы і песні паэтэсы, выступленні землякоў і гасцей. Дрыбінская паэтка Настасся Кананкова прачытала свае вершы і перадала Ніне Дзмітрыеўне букет рамонкаў як напамін аб незабыўнай пары дзяцінства. Зямлячка з вёскі Пудаўня І. Руднікава прысвяціла ёй такія радкі:
Так живи же подольше
с красивой душой,
Вдохновенье вселяй слабым
людям.
Ты нам даришь надежду,
бесценный покой.
Пусть же путь твой земной
светлым будет.
І, сапраўды, усе выступаючыя адзначалі жыццесцвярджальны пафас паэзіі Ніны Кавалёвай. Яе вершы іскрацца радасцю жыцця, разуменнем мудрасці яго і сэнсу. Цяжка паверыць, што радкі, поўныя аптымізму і радасці жыцця, мог стварыць чалавек, прыкаваны да ложка. Ніна Дзмітрыеўна і ў такім стане ўмее быць шчаслівай і прымаць усё як належнае з пакорнасцю волі Божай. У гэтым і ёсць найвялікшая мудрасць і сіла духу, і гэтаму можна ў яе павучыцца.
Бурнымі  апладысментамі прымалі землякі і яе песні ў выкананні таленавітых спявачак. Атрымаўся цудоўны канцэрт, на якім прагучала і новая песня Ніны Кавалёвай “Вёсачка”. Гэта сустрэча, па словах прадстаўнікоў аддзелаў культуры двух раёнаў, дала новы штуршок для папулярызацыі літаратурнага краязнаўства і больш плённага супрацоўніцтва паміж творчымі калектывамі суседніх рэгiёнаў.
Л. ДЗЕРУЖКОВА,
кіраўнік
грамадскага народнага
 літаратурнага аб’яднання “Роднае слова”.